Welkom op mien blog http://grunnegerbiebelgedichten.blogspot.com
Noast de Grunneger Biebel is er misschain ook vroag noar Grunneger gedichten over biebeldailen of geleufsgedichten.
De gedichten dai joe hier lezen mag je met vermelden van mien noam ook bruken veur joen liturgie, kerkblad of zukswat.
Ain van mien bouken is ien t Grunnens schreven. Dat is t bouk Grunneger Biebelgedichten. Dit bouk (12,95) ken je ook bestellen via 06 20182396 of via cobytjeert@live.nl Den huif je gain portokosten betoalen. (Aal mien bouken, 13 stuks, bennen bie bestelmijnboek.nl en bol.com te koop en te lain ien biebeltaik van stad.)
Mocht u de Nederlandse vertaling zoeken van deze gedichten, die kunt u vinden op http://schriftgedichten.blogspot.com/
Ik hoop dat elk zich hier thuus vuilt en wens joe n baarg leesplezaaier. Vrundeleke groet van Coby Poelman-Duisterwinkel.

zaterdag 31 december 2011

Oavendmoalsgedachte

Zo ver as t Oosten
van t Westen ligt
bennen onze zunden
wegdroagen.

Vanuut t Oosten
riest de Zun,
verlicht ons
tot t Westen

begroaven
alles wat wegdroagen is
om elke mörgen
ons op te wekken
ien Zien Licht.

Bie Psaalm 103 : 12

Coby Poelman-Duisterwinkel.

vrijdag 30 december 2011

Ain kudde




Hai haar t over schoapen
en heur aigenoaregheden.
Wolven waren
hierveur slim beducht
want as n kudde
van de baargen
oafstörmen kwam
ging maineg wolf
wel op de vlucht,
moar laip n schoap
allain te dwoalen
waren de wolven
nait van de lucht.

Hai haar zich denk ik
zo in heur verdaipt
omdat God zulf hom
ooit as herder raip.


Coby Poelman-Duisterwinkel

Bie Johannes 10 : 16


Uut de bundel: "Grunneger Biebelgedichten"

Kunstwaark van Sjoke Wassenaar

Raizen met bliedschap

Heer loat mie blied
mien weg met Joe vervolgen
zoas dai koamerling
uut Ethiopië dat dee
omdat hai noa Jesaja 53
de hoofstukken
dai volgden nait vermeed

Het was Joen Geest
dai hom Filippus stuurde
om uut te leggen wat er las
vervuld deur de herkenning
dai ien hom vuurde
ree er vernedering veurbie
woar der al van genas

Heer loat mie raizen
deur Joen Woord
met het verlangen
van dai koamerling,
open mien haart
om gloudvol te verklanken
Joen vreugde woar
de Geest al over zingt.

Bie Handelingen 8 : 26 - 40 en Jesaja 56 : 1 – 8 met noadruk op vers 39b uut Handelingen 8.

donderdag 29 december 2011

Hof van Leven


Der stonden negen bomen
ien de Hof van Leven.
De laifdesboom
droug nog de maiste vrucht,
de boom van vrede
haar nogal wat leden,
de vreugdeboom
roakte nait uutput.

Dai van geduld
zol loater bluien,
vrundlekhaid
boog zachtjes deur de top,
de boom van goudhaid
begon uut te lopen,
dai van geleuf
bestoof de stille hof.

Zachtmoudeghaid
waigde heur riepe vruchten,
ston kloar veur
t vieren van n feest,
de boom van zulfbeheersen
mog zien hartje luchten,
zo drougen ze soamen
de vruchten van de Geest.

Ik vroag Joe
hail beschaiden,
loat ien mie
toch ook gruien
zo’n bluiende
Hof van Leven,
wil mie op Joen menaier
dai volle wasdom geven.

Coby Poelman-Duisterwinkel

Bie Geloaten 5


Uut de bundel 'Grunneger Biebelgedichten'