Welkom op mien blog http://grunnegerbiebelgedichten.blogspot.com
Noast de Grunneger Biebel is er misschain ook vroag noar Grunneger gedichten over biebeldailen of geleufsgedichten.
De gedichten dai joe hier lezen mag je met vermelden van mien noam ook bruken veur joen liturgie, kerkblad of zukswat.
Ain van mien bouken is ien t Grunnens schreven. Dat is t bouk Grunneger Biebelgedichten. Dit bouk (12,95) ken je ook bestellen via 06 20182396 of via cobytjeert@live.nl Den huif je gain portokosten betoalen. (Aal mien bouken, 13 stuks, bennen bie bestelmijnboek.nl en bol.com te koop en te lain ien biebeltaik van stad.)
Mocht u de Nederlandse vertaling zoeken van deze gedichten, die kunt u vinden op http://schriftgedichten.blogspot.com/
Ik hoop dat elk zich hier thuus vuilt en wens joe n baarg leesplezaaier. Vrundeleke groet van Coby Poelman-Duisterwinkel.

donderdag 20 december 2012

Hail en zegen


Van geslacht op geslacht
wer t hail
van God verwacht,
Zien zegen
deurgeven,

dat Hai joe
ook nou
vullen mag
met Zien vrede

Coby Poelman-Duisterwinkel


Uut de bundel: 'Grunneger Biebelgedichten'


vrijdag 23 november 2012

Adventskedo


Ien kerstboom hangt n ster,
waarkje van kleuterschaul.
Langs deurschienend oranje
omlient fienprikt zwaart
de draihouken,
zes groten en zes klainen

ien golden letters
stait ien t hartje schreven
de metgeven boodschap
Ere zij God!

Ien mien herinneren
zug ik t lutje wichtje,
heur oogjes stroalen
al van ver,
joar in joar uut
schient op t zaacht oranje
n hemels licht over
d allerlaifste ster.

Coby Poelman-Duisterwinkel

donderdag 22 november 2012

Kom mor ien t Licht

As er gain plak is
veur t Licht
dat zich verploatst
ien mensen
donkert t duuster
verder dicht.

Omdat Hai
louter Laifde is
is er as Kiend
op wereld kommen
zodat Hai
ploatsvervangend
de mens
aan t licht
loat kommen
deur t daipste
van de duusternis

opdat t veur altied
Poasen is.

Coby Poelman-Duisterwinkel

dinsdag 20 november 2012

Alles goud met moeke en Kiend?


Aargens ien n koamer
stait n berre op klössen.
n vrouw bevaalt.
As pien nait meer
te holden liekt
klinkt t verlössend
schriwwen.

Aargens ien Bethlehem
laip n bevallende vrouw.
n Koamer was der nait,
loat stoan n berre op klössen.
Heur pien werd
hardvochtig meden.

Heur Kiend het loater
pienlijk veul leden
terwail Er kwam 
om te verlössen.

Coby Poelman-Duisterwinkel.
 
 

vrijdag 2 november 2012

Is t al licht?

t licht dat schittert ien ogen
van elk dai van laifde braand
veur Christus en Hom wil verhogen,

t licht dat schient in bliede mensen
dai verlangend noar Zien komst
heur vreugdevuur verspraiden,

t licht gericht op t Koningskiend
dat t kwoad overwon
en duusternis verblindt,

dit licht zel met kaarstdoagen branden
en stroalen as n waarm vuur
ien wel aan Hom heur hart verpanden.

Leeft er nog ain ien duusternis?
Geef den as de herders deur
wat die aan weerglans geven is.

Coby Poelman-Duisterwinkel

donderdag 1 november 2012

De bliedschap van Elisabet

Toen Maria
vol bliedschap
Elisabet opzocht
heur stroalend begroette
droagend de vrucht van God

kon zai vermoeden
dat de Hailige Geest
Elisabet vulde,
t kiend ien heur
opspringen dee?

heur uutroupen lait:
Gezegende aller vrouwen
zegend is dien vrucht
ien dien schoot vollen

volgd deur heur roup
dai veur elk dai t leest
n taiken van troost
en bemoudegen geeft?

Gelukkig is zai
dai geleuvig vertrouwt
op wat de Heer zegt
en op Hom bouwt.

Coby Poelman-Duisterwinkel

Bie Lucas 1 vers 39 - 46

dinsdag 25 september 2012

Allerlaifst publiek


As ik mien mond in V-vörm trek
onder de rood met witte ruutjespet
bebloumd met n margriet
liek ik toch oareg vredeg,
is t niet?

De kunstenoar bestriekt in zien decor
n vleugje wereldvrede
woardeur mien doefmeziek beneden
de snoaren zuikt dai 
gain striekstok roaken ken.

O, dat oeit vredestichters
echte Vrede winnen,
den speul ik sterren van de hemeljas
dai mie ien Koningsblaauw omaarmt,
joe, allerlaifst publiek verwaarmt.

Coby Poelman-Duisterwinkel

Vertoaling van t gedicht "Zeer geliefd publiek" dai ien t bouk "Echo van de stilte" van de kunstenoar uut Litouwen Torcqué publiceerd is.

woensdag 12 september 2012

t Hannagevuil

As ze de stille hoop
dai zo voak veur niks was
uutsproken het
komt heur gevuil,
mie nog zo aigen,
weer levend ien mie boven.

Verwachting stiegt,
tegenslag holt zich schoel...

as heur teleurstellen
mien haart aandut
is t of troostend
Hanna ien mie hoelt.

Coby Poelman-Duisterwinkel

donderdag 19 juli 2012

Profetes Hanna

Ien n kunstwaark
zag er n lege kerk
vol met riegen stoulen
tussen zwoare piloaren.
Op ain van aal dai stoulen
zat n gebogen vrouw,
ien stil gebed.

Zo stelde hai zich
Hanna veur, de profetes
dai zunder op te holden
vasten bleef ien de tempel
en dai der was
dou Jezus op de
uutstoken arm
van Simeon legd wer
dai hulde brocht aan God,
en proatte over t Kiend
dai redding brocht,

Hanna, genoade
brochten zai heur,
en vrede van God!

Coby Poelman-Duisterwinkel

Bie Lucas 2 : 36-38.
  
.

vrijdag 13 juli 2012

Zundag


Joen zun verriekt
de zummerdag
Joen Geest is
zaacht aanwezeg,
Joen Woord klonk
ien de mörgndainst

nog noagenietend
zunt de zundag voort
t lichtdeurloatend groen
kleurt tegen t hemelblauw
schoaduw fluustert Joen luuster

woar zundag moandag wordt,
t donker licht ontmoet
ontwoakt ien mensenogen
vannijs Joen zundagsgroet.

Coby Poelman-Duisterwinkel

vrijdag 29 juni 2012

Doe bist n Koningskiend!

Heer,
woar ik klain was,
van gain betaikenenis
ien mensenogen,
kwamen Joe ienaind
met Joen nait uut te meten
hoopgevende en
veulbetaikenende woorden.
Joe waren bie mie
Joen stem klonk deur de wiend

Nog klinkt het koninklek
en krachteg ien mien oren:
Doe bist n Koningskiend!

Coby Poelman-Duisterwinkel

vrijdag 15 juni 2012

Oafschaidsperspectief



Wanneer de stilte
Joe begunt te priezen
de ziel gait raizen
wacht Joen belofte
dat het lichoam
zol verriezen
op Joen tied.

Coby Poelman-Duisterwinkel


Familie van Jezus

Vrouw,
dai noeit boaren kon
waist da stoe de moeke
van Jezus zulf weden magst?

man,
dai ainigst kiend bleef
waist da stoe de bruier
van Jezus zulf weden magst?

Ien Marcus drai
zee Jezus
dou der t volk overzag:
Hier bennen mien moeke
en mien bruiers

want dai de wil van God doun
dai bennen mien moeke, zus
en bruier.

Bie Marcus 3 vers 31 - 35.

Coby Poelman-Duisterwinkel

woensdag 13 juni 2012

Verjoardagsgedicht


Verjaardagsgedicht_1

t Is vandoag
n biezundere dag
en doarom dit gedicht.
Joaren leden
verscheen dien geboortebericht.

Doe kreegst n noam
en een aigen gezicht,
kiek mor es ien de spaigel.
Joa, kiek mor es goud
zai diezulf ien t Licht
van dizze biezundere dag.

t Is vandoag feest
omdat stoe der bist!
Wait dast der weden magst

n Haile goeie verjoardag!

Coby Poelman-Duisterwinkel


maandag 11 juni 2012

Bederschap


Dien lege plek
kiekt mie veulzeggend aan,
mien binnenste vertoalt
ien stilte
wat ik veur die
vroagen wil
ien Zien noam.

Dastoe de Trooster
op dien plek
van dichtbie
magst verstoan.

Coby Poelman-Duisterwinkel

woensdag 6 juni 2012

As n boom....


Mien worrels
bennen deur n rivier
omgeven
met wodder van
t zuverst soort,
al lig ik veld
veur dood,
der is ain hoop,
mien worrels leven.
 
Coby Poelman-Duisterwinkel

Bie psalm 1


Uut de bundel: 'Grunneger Biebelgedichten'
 

vrijdag 1 juni 2012

Huus van God

Zuikend
de volmoakte kerk
dai nog nait is te vienden
of de volmoakte mens
dai dizze stichten ken

lezend
t volmoakte Woord
maar twiefelen aan
wat er schreven stoat
Heer, wek de kerk tot leven

Bouwend
aan n kerk
woar Christus wordt beleden
ien de volmoakte Mens
Gods aigen Zeun

ontvankelek
veur ‘t Woord
vanuut Gods Geest schreven
is dat misschain
t huus woar God ien woont?

Beliedend
Voader, Zeun en Geest
ien áín geleuf
deur Christus zulf ons geven

oefenen
wie ien Gods huus
Zien Koninkriek dat komt!

Coby Poelman-Duisterwinkel

vrijdag 25 mei 2012

Poasgevuil op t Pinksterfeest

Dank Joe Voader
veur Joen Geest
zo dichtbie
op dit Pinksterfeest,
ik zag t veur mie
al dai mensen ien
Joen noam bie mekoar
ien vrijmoudighaid
getugend
‘k zag degenen
dai Joen Zeun
wollen krusen
spiet betugen.

Vervul ze dai
nog twiefelen of
dai ontkennen
Zien bestoan

Vol van Joen Geest
zing ik vrijmoudig;
de Zeun van God
is opstoan!

Coby Poelman-Duisterwinkel

Bie Handelingen 2 : 14 – 40




woensdag 23 mei 2012

Woar twai of drai.....

Biddend
zingt t koor
Zingend
antwoordt de Geest
Zien echo vult de roemte
t pinkstert!

Coby Poelman-Duisterwinkel

n Heerleke mörnen

t Groen en blauw zingt
deur mien roam
van opstanding en leven
oadem woasemt over t veld
de merel dribbelt etend.

De woaterlelie rust nog dicht
achter de uutlopen beuk.
Straks zel de blom
zich glorieus ontvollen

ik zel mie aanklaiden om
dit wonder van dichtbie
te aanschouwen.

Coby Poelman-Duisterwinkel

Bie Mattheüs 6 : 25 - 34

maandag 14 mei 2012

Lichoamstoal


Ien ain Geest
deupt
werden wie
ain lichoam.
Doun wie ain zeer,
t roakt ons haile lichoam.
Hemelen wie mekander op,
t haile lichoam stroalt!

Deur te leven
ien Gods Geest
viert ons lichoam
Pinksterfeest.
 
Vrij noar 1 Korinte 12

Coby Poelman-Duisterwinkel


Uut de bundel 'Grunneger Biebelgedichten'

vrijdag 11 mei 2012

Joe bennen nog net op tied

Aal verder
volt t lichoam zich
tot feutes
totdat t leven
staarvend heur verloat

ontvollen wordt ze
wegdroagen
en met gevollen handen
noastoard

dai ooit mien laifste
ien zich droug,
ze is veurbie
moar nait veurgoud
want ze ging vol vertrouwen;
genoade bleek genog.

Coby Poelman-Duisterwinkel

vrijdag 4 mei 2012

Hemelvoartsdag

Zugst dat
dai wolk, dai lichte,
doar ging Er ien
kiek den, Hai gait omhoog
wat zee Er ook alweer
mouten wie wachten
zol er n belofte
ien vervullen goan?
Hou zol dat weden
as je met Geest
ien ploats van wotter
deupt worden
en den dai kracht
dai wie doarvan kriegen
zol dai ons helpen
om te vertellen over Hom?

Kiek nou,
Hai gait aal hoger,
wordt aal voager
waistoe nog wat Hai over
uutenden van de oarde zee?
Hou kennen wie nou zunder Hom...
Oe, wat n licht, stil, luuster
Ze zeggen dat Hai ook
weeromkomt op n wolk.

Zollen we mor doun
wat of Hai zegd het
totdat wie deupt worden
met de Geest
kom loat ons opgoan
biddend wachten
op wat de Voader
ons beloofd het
ien de Zeun.

Coby Poelman-Duisterwinkel

Bie Handelingen 1 : 3 - 15



maandag 30 april 2012

Ik ben Dai Ik ben



As Joe met ons bennen,
alle doagen,
en zegd hemmen
Ik ben dai Ik ben
en zel weden
wel Ik weden zel,

as Joe ien Joen Woord
ons zoveul kracht
geven tot geloven,

wel zol den
ons braandend haart
nog doven?
 
Bie Exodus 3 : 13, 14


Coby Poelman-Duisterwinkel


Uut de bundel 'Grunneger Biebelgedichten'

Foto is nomen vanuut kerkje van Fransum

dinsdag 24 april 2012

Traauwringen




De ringen van traauw
as symboliek
op dizze traauwdag geven
bennen as de joarringen
van joen levensboom,
worreld ien Gods laifde
met mekoar verweven.

Zolaang de traauw
deur laifde voud wordt
is joen levensboom gezond
en gruit er goud.

De ringen van Gods traauw,
dai joen joarringen omgeven,
vörmen droagkracht
veur de mooiste vruchten
van joen huwleksleven.


Coby Poelman-Duisterwinkel


Uut de bundel: 'Grunneger Biebelgedichten'


Foto is nomen vanuut kerkje van Fransum

woensdag 18 april 2012

De doef

As op n dag
gericht
n doef verschient
veur n open roam,
wegmaait wat
veur zien voeten ligt,
n rondje deur
de koamer vlugt
en den verdwient

is dat den nait n taiken
van Hom veur ons bedoeld,
vuil ik de oademtocht
nog ien de roemte?

Mien geest verroemt
bie de gedachte
dat wat er ook mor
veur zien voeten ligt
Hai uut de weg roemen zal
veur mie openstoand,
ien warme laifde
wegen boant.

Coby Poelman-Duisterwinkel.

zondag 15 april 2012

As t Poasen wordt


t Was nog heul vroug
wie laipen met eulie
om Zien dode lichoam
veur eeuweg te bewoaren
mor vonden een verloaten graf

Wie zagen blinkend licht
en heurden ain vroagen
woarom wie bie de doden zochten
Wel ien leven was

Verschrikt en baang
keken wie omhoog,
heurden een Engel proaten
Hai broacht ons Jezus' woorden
ien herinnering
nou drong zien opstanding
en leven pas tot ons deur
al hadden wie zulf
Hom nog nait zain.

t Is nou al loat
roek je de kruden
van Zien eulie?
Wait je dat Hai ons lichoam
tot aan opstanding bewoart?

Geleuf ons als wie t je
vertellen, loat joe verboazen;
Komt Jezus' woord
joe ien herinnering
den wordt t Poasen!

Coby Poelman-Duisterwinkel

Schreven n.a.v. n preek over Lucas 24 : 1 - 13

t Kunstwaark is van de Grunneger kunstenoar Anco Wigboldus dai ien Zuudhörn woond het.

zaterdag 14 april 2012

Opwekken bie Naïn

Uut Naïn lopt n optocht
van mensen met daip verdrait
n weduwe verloor heur ainigst kiend.

Van d’ overkaant komt nog n groep
de Levensvörst veurop
dai bliedschap onderviendt.

Ze kommen mekoar tegen
rouw slagt op de blieden
hou reageert de Meester?

Hai loat zich roaken, Hai liedt met,
de Levensvörst ien troanen
komt ien bewegen, roakt de boar.

Geft heur t levend kiend ien handen!

Deur Naïn lopt n grode groep
van opgewekte mensen
t leven tegemoet!

Coby Poelman-Duisterwinkel

Bie Lucas 7 : 11 – 17.

dinsdag 10 april 2012

Kracht

Woar komt dai kracht toch vot
ien doagen noa n overlieden
bie zaikte, leed
of pienbestrieden

d aander zwak
joen hulp verwacht
mensen op joen weg broacht

as vleugels onder
over en om joe
vuil je hou
deur n wolk gebeden
joe deur Zien kracht
rechtstreeks worden omgeven.

Coby Poelman-Duisterwinkel

maandag 9 april 2012

Verlangen

Söms is t vureg
den weer laauw
mor nou
deurstroomt
n laifde veur Joe
zo biezunder
dai as ik
t omschrieven zol
gain bouk
bevatten kon…

der is wat nijs
onder de zun!

Coby Poelman-Duisterwinkel

donderdag 5 april 2012

De doorn ien t vlees

Drai moal
klonken Paulus zien gebeden
om verlössing
van de doorn
moar Zien genoade
zee de Heer
was hom genog

dai aine doorn
licht op
ien ‘t schemerdonker
van n deur bloud
gekleurde doornenkroon.
Drai moal bad Jezus
om ‘t veurbiegoan
van de beker

as ien gebeden
om verlössing
verheuring nog
liekt te ontbreken
deurstroomt de kracht
van de genoade Gods
bie t drinken
uut de beker.

Coby Poelman-Duisterwinkel


N.a.v. 2 Korinthe 12 : 1 – 10 en Romeinen 8 : 28 – 39.

woensdag 4 april 2012

Welke Bartimeüs roupt doar?

Wat droag stoe met die met
aan stried, verdrait of zörgen,
stai stoe ook aan de kaant
en wat du stoe?
Roupst as Bartimeüs
of dien leven der van oafhangt:
Jezus, Zeun van Doavid,
heb meelieden met mie?
Hai gait aandern veurbie
want doe hest Hom roupen,
Hai het dien stem wel heurd
en zegt: Stoa op, hol moud,
kom mor bie Mie
en doe zolst zain,
den komt t goud.

Zug ik de Bartimeüssen
wel zitten aan de kaant,
ben ik der al op oafstapt
met uutstoken haand,
heb ik al tegen ze zegd, hol moud,
der is Ain dai die roupt,
ik breng die noar Hom tou,
vertrouw op Hom,
den komt t goud.

Coby Poelman-Duisterwinkel.

Bie Lucas 18 of  Marcus 10 : 46 - 52

woensdag 28 maart 2012

Gebed om Koninkleke kracht

Joe gaven ons Heer
deur 't zwoarste kruus
n nije geest
van Leven
en openden de weg
noar 't Koningshuus

Heer, staark
Joen Koninkleke leden
deur dizze geest
van Leven.

Coby Poelman-Duisterwinkel

vrijdag 23 maart 2012

Levenslicht

Kiek hou de vrouw
ien boarensnood
heur pien te boven komt
deur ‘t nije leven

hou de Verlösser
ien staarvensnood
de pien ten onder
lait goan

hou de schepping
zuchtend hoopt
op t nog onbekende Leven

Kondig met Poasen
verlöst
de Nije Adam aan!

Coby Poelman-Duisterwinkel


Schreven n.a.v. n heule mooie preek over Johannes 16 : 16-22 en Romeinen 8 : 18-25.
Preek is nog te beluusteren op kerkomroep.nl Martinikerk Grunnen, dainst van 4 maart 2012 om half 10.

donderdag 22 maart 2012

Heur laifste laid

Zingen lukt heur nait
moar lichoamstoal
klinkt des te meer
bie ‘t heuren van:
nou zingen wie…

Mien zingen
lukt nait meer,
zolaang ik noar heur
vreugdekreten luuster
dwaars deur heur lieden
drink ik mien troanen ien
en heur van alle zieden
ien glorieus getugenis
wat n Vrund
ons Jezus is.

Coby Poelman-Duisterwinkel

dinsdag 20 maart 2012

Wel is mien noaste?

Dai Sameritoan,
n vijand ien heur ogen,
deur meelieden
bewogen
zug ik ienainend
met aander ogen

want k heurde op n zundag
dat t Jezus was
dai de stumper zag,
hom op de kneien verzörgde
langs wegkaant
ien t gras.

Waist
wel dien noaste is?
de noaste dat bist
ast deur meelieden bewogen
handelst zoas Hai.

Coby Poelman-Duisterwinkel

Bie Lucas 10 : 25 – 37

donderdag 15 maart 2012

Mien Trooster


Wanneer ik bid
heb ik mien ogen dicht
moar wait Joe noast
of achter mie

as ik mien ogen open
ben Joe verdwenen uut t zicht
moar ien mien haart
stroalt waarm Joen Licht.

Coby Poelman-Duisterwinkel

maandag 12 maart 2012

Krookjes van Hoop

Op t kerkhof stait n wilg
te dreumen ien de zun.
Krookjes ien blui
kieken bie stam omhoog
asof ze dreumer roupen:
wor toch es wakker
hest ons al zain
wie vieren hier t veurjoar,
kiek onze gele hartjes
opend noar de Zun
dai ons ontvollen het
as taiken van Hoop,
wie bennen wel even dood west
moar kiek ons toch es leven!

De dreumerege wilg
wordt wakker
van al dat jonge gruin,
bekiekt de kleuren
wit, geel, paars,
de mooie open hartjes,
bedenkt hou voak
hai snoeid is en
weer uutlopen.

Hai groet de bliede krookjes
met boegend takgezwaai,
n zwaarde kraai schrikt op.
t kerkhof dommelt deur,
wachtend de Grode Zummer.

Coby Poelman-Duisterwinkel.

zaterdag 10 maart 2012

Vol laifde

Zoas n moeke
noar heur zoegeling
kieken ken,
ien koesterend
geboar heur laive
woordjes fluustert

ervoar ik Voaders
zaacht geloat
wanneer Hai
trouw ien laifde
noar mie luustert

ientied dat ik
met Hom
as n kiend
met moeke proat.

Coby Poelman-Duisterwinkel

vrijdag 9 maart 2012

t Leven van n partituur

t Widde vel,
deur zwaart ientaikend,
ontelboar bennen de noten,
kruzen, mollen, bogen.

Doar komt de muzikant,
t heufd ontciefert,
vingers beroeren,
stilte breekt
ien klanken
haard en zaacht.

t wonder van
n partituur
ien Geesteskracht
deur mens en ienstrument
tot leven broacht!

Coby Poelman-Duisterwinkel

woensdag 7 maart 2012

Poasen ien t zicht!

De boom van leven
ien de Hof van Eden
wer deur de zundeval
de boom van dood.
t Zwoare kruus
uut dizze boom vervoardegd
wer droagen
door Gods aigen Zeun.
Dood en zunde
lait Hai achter ien Zien graf.
Zo kon de boom van dood
weer vruchten droagen
omdat Hai vergaf.

Verrezen uut de dood
ging Hai Zien kiender veur
deur de verloaten Hof
noar ‘t Hemels parredies!

Coby Poelman-Duisterwinkel

dinsdag 6 maart 2012

Jozef van Arimatea

Zug je dai man,
zo haildaal aans
dai om t lichoam
van Jezus vroug
t zörgzoam wikkelde
ien linnen, noar n nij
uuthouwen rustploats droug,
achter hom aan dai vrouwen
met daip verdrait

hai het veur Hom
n ploats beraid,
hai, levend ien verwachten
van God zien koninkriek,
t lichoam henvlaid
ien t gezelschap
van de vrouwen.

Wel is toch dizze man
met dai bekende noam,
wat geft hai deur zien handelen
de mensen te verstoan,
vuil je de rust ien dizze man,
zien staarke Godsvertrouwen,
de stilte ien de toen,
de eerbied van de vrouwen,
heur moud om noa Zien staarven
reukeulie te beraiden?

het geft mie holvast
ien de liedenstied.

Coby Poelman-Duisterwinkel

Bie Lucas 23 : 50 – 56.

vrijdag 2 maart 2012

Post veur joe

Noast hom
lag n vrouw
dai er nait kende.
Hai was bewogen
om heur lot.
Ze was verguld
met n beschreven koartje.
Zielsgelukkig
gaf ze t deur
aan hom.

Hai las de woorden
uut t Woord van God.
Toen er ze uutsprak
heurde ze Zien stem.

Ontroerd
deur heur geloof
zag er hou
deur n mistgedien
n haand noar hom tou schoof.

Coby Poelman-Duisterwinkel

woensdag 29 februari 2012

De deupdainst met t oormaark

De deup
zee domenee
ken je vergelieken
met n herder die
zien kudde uutbraaiden wil.
t nije schoapke
kriegt n maarkje ien t oor.
De herder zegt:
nou heurst bie mie,
en bist mien aaigendom
gainain mag die
uut mien kudde hoalen
omdat ik veur die zörg
en die beschaarm,
geheurzoam mie.

As de schoapkes
bie de kudde blieven
is de herder heul dichtbie.

Coby Poelman-Duisterwinkel

vrijdag 24 februari 2012

Mooie preek!

As heurder
was er der
deur grepen
en met hom veul
zee hai.

Toen der ain vroug
of der ook nog
met bouwd was
trok er zien
schollers op
dai er der onder zette
toen gainain
der meer op lette.

Coby Poelman-Duisterwinkel

donderdag 23 februari 2012

Scheuren ien t plaaisterwaark

Scheuren ien t plaaisterwaark
van de gerestaureerde kerk
vertellen de historie
van wel verwond deur t verleden
louter kerkpoaden betreden
veur concert of glorie.

Wanneer de wond ontplaaisterd is
komt roemte veur vergiffenis
breekt Zien bevraaiding deur.

Coby Poelman-Duisterwinkel

woensdag 22 februari 2012

Hai ken die

Omdat de Heer die wild het
bis toe deur Hom schoapen
Hai haar zien plan al veur die kloar
zag ien de moekeschoot die sloapen
opende stil dien levensoadem doar.

As t duuster ien dien leven wordt
wait die den ien Zien schoot droagen
Hai ken die en herkent t kruus
wait ook dien levensvroagen
woar stoe t nait allain meer kenst
droagt Hai t met die verder

geef die moar over
aan t ritme van zien tred.

Coby Poelman-Duisterwinkel

Bie Psaalm 139.

zondag 19 februari 2012

n Nij begun

Wereld was leeg
veur de schepping.
Gods Geest
zweefde
over t wotter.
Mensen waren
der nog nait,
nog gain pinksterbloum.

Wereld vúilde leeg
noa Hemelvoart.
Hailege Geest
waaide
over t laand,
vulde mensen
met Pinkstergloud

en kiek,
t was goud!

Coby Poelman-Duisterwinkel

donderdag 16 februari 2012

Verheug joe


Ja, ik verheug mie
ien de Heer,
Hai is dichtbie,
ik vuil het
ien alle vezels
van mien vlees,
Hai stroomt
ien levensoadem
deur mien geest,
Hai ken mie en
aal wat mie bezeghold,
Verheug joe

Hai legt Zien vrede
ien mien haart
as antwoord op
mien bidden
en mien danken,
Hai klaidt mie
met zien vrundlekhaid
en neemt mie zörgen of.

Zien vreugde vuil ik
woar de woarhaid is
rechtvoardeghaid de zege viert,
woar deugd en edelhaid
zien lof verdaint,
gebeurt wat Hai ons leerde,
Hai vult mien hoogst begeren.
 
Coby Poelman-Duisterwinkel

Bie Fileppenzen 4 vers 4 - 9


Uut de bundel 'Grunneger Biebelgedichten'

zaterdag 11 februari 2012

Lichtende Schaduw

k zag n voage regenboog
over n heldere
henbogen
asof de ain de schaduw
van de aander was.

Mien pas vertroagde,
zilverkleurig vlogen
speulse vogels
veurlaangs
en onderdeur
tegen t lichtend
donkergries.

Ik ondervon
hou schaduwrieke vleugels
zich spraidden over mie.

Coby Poelman-Duisterwinkel.

Bie Psaalm 91

zaterdag 4 februari 2012

De stille kracht ien n moeke

Moeke leerde t ons al:
noeit kwoad sloapen goan
en goud oafschaid nemen
n dag ken zo ienaind
je leste weden

Mattheüs hoalde
t ien de Biebel aan
as je wat met je bruier hemmen
moak t den doalek
goud met hom

zo nou en den
denk ik doar aan
as ien of om mie hen
onaineghaid ontstait

mag ik dat wat wie
van mien moeke leerden
en wat mie ien t leven
zoveul vrede broacht
hier met joe dailen
Hom ter ere,
mien moeke dankend
veur wat zai ons gaf?

Coby Poelman-Duisterwinkel

Bij Mattheüs 5 : 23 en 24

maandag 23 januari 2012

Nardusmirre

Zoas de reuk
van nardus,
vergoten deur de
Messiaanse bruid,
zo ben Joe bie mie.

Zoas de Zeun
veur zien begroafenis
ien ’t veurdeel
van Maria zee:
Mie heb je nait altied…

zolang de Koning
aan zien toafel zit
verspraaidt de nardus
mie zien reuk
totdat Hai komt!

Coby Poelman-Duisterwinkel.

Bie Johannes 12 : 8 en Hooglied 1 : 12

donderdag 19 januari 2012

Zuikend

As je denken
dat je eindelijk
vonden hemmen
woar je om zochten
ben je t veur
je t waiten
al weer kwiet.

Sums vien je
zunder zuiken,
ben je vonden
veur t zuiken aan.

Dat is t mooie
van Ik ben.

Coby Poelman-Duisterwinkel

maandag 16 januari 2012

De betaikenis van de eulie

k heurde vandoag wat nijs
ien t verhoal van de Bruidegom
en de wachtende wichter
dai slaipen bie Zien komst.

De eulie ien de lampen
is laifde veur Hom
dai op Zien komst lait wachten,
ze schrokken deur n stem.

Heur eulie was al op,
ze mossen nije kopen,
ze konden toch nait zunder licht
ien ‘t duuster verder lopen.

Woar ken je eulie kriegen,
hadden ze moar wat kocht,
ze hadden tied genog had
moar nait serieus zocht.

Aanderen hadden rekend
op wachten ien de nacht,
zai wisten wat t betaikent,
heur laifde was heur kracht.

Zo konden ze haildaal blied
de Bruidegom ienhoalen,
de Man dai al heur schuld
vol laifde wol betoalen .

Kenst nou nog eulie hoalen,
Hai schenkt ien overvloud.
Goa met voldounde veurroad
verheugd Hom tegemout.

Coby Poelman-Duisterwinkel

Bie Mattheüs 25 : 1 – 13.

vrijdag 13 januari 2012

Wát n Veurganger!

Doar gingen ze,
de leerlingen van Jezus,
baargopwoarts
noar Jeruzalem
en Jezus ging ze veur
heur oaf en tou
onder vair ogen nemend,
om te vertellen wat Hom
te wachten stond,
beslutend met
hoopvolle woorden
dat Hai noa drai doagen
weer opstoan zol.

Doar goan we,
baargoafwoarts
of toch moar
achter Jezus aan?
Hai wil ons groag
onder vair ogen nemen,
om te vertellen wat of ons
den te wachten stait.
Hai het de zwoare weg
veur ons deurlopen
opdat wie hoopvol
onze weg
baargopwoarts goan.

Coby Poelman-Duisterwinkel.

Bie Marcus 10 : 32 tot 34.

donderdag 12 januari 2012

t örgel speult

“t örgel speult”
stond op de liturgie.
Örgenist doacht:
zel ik den moar
ien kerk zitten goan
en oafwachten
wat er komt?

Hai keek es ien t rond.

Ienaind
werd er roakt deur n waike
toets van zien gewaiten
en terstond
speulde örgenist
vol groatie
zien ontroerendste
iemprovisoatie.

Coby Poelman-Duisterwinkel

woensdag 11 januari 2012

Vouten wassen


Zugst Hom doar zitten
op zien knijen,
t eten onderbroken,
met n koem wodder
en zien linnen gorreldouk?
Hai wast het voel
van overschreden vouten,
dreugt ze met zörg
zoas gain aander dut.

Heb ik oeit aanderman
zien vouten zo wossen
boeten mien aigen kiender om?
Hou voak nam ik
het voel van n aander
zodat dai schoon
weer verder kon?

Heer, leer mie toch
bie t zain van voel
mien neus nait op te trekken
moar net zo laifdevol als Joe
mien aarms uut te strekken.
 
Bie Johannes 13

Coby Poelman-Duisterwinkel


Uut de bundel: 'Grunneger Biebelgedichten'

dinsdag 10 januari 2012

Woar laifde woont

De bejoarde vrouw
dai er bezocht
was ien heur ainzoamhaid
verleerd te proaten.
Omdat ze zwiegen bleef
wis er nait meer
wat er mos doun of loaten.

Op n duur
zong er veur heur
schoon met homzulf verlegen
de olle psaalm:
“Woar laifde woont
gebiedt de Heer
Zien zegen….”
Ontroerd zag er
heur lippen metbewegen.

Zien stem brak
toen zai betroand
heur hand noar hom uutstak
en hom bedankte
veur zien onderdak.

Coby Poelman-Duisterwinkel

zondag 8 januari 2012

De man op t kerkhof

Der was n man
op t kerkhof,
hai rustte
van zien zwoare waark.
Ik kwam
om n gedicht
te brengen,
hurkte
bie de zwaarte zaark,
legde t veurzichtig,
aandoan
onder n koperen gewicht.

Zag ik de toenman kieken?
k vuilde troanen,
hai lait niks blieken.
k streelde
de gekaarfde letters,
spelde de bekende tekst.
Kwam de toenman
ien bewegen,
gebogen laip er
richting kerk.

Stille Toenman,
met joen bewogen hart,
hemmen joe misschain
van mien daipste smart,
snokkend uut mien
herinneren groaven,
n groot deel
met Joe metdroagen?

Coby Poelman-Duisterwinkel.

zaterdag 7 januari 2012

Daniël

Doar zit er
tussen de mensen
die vremde goden eren
met n bord gruinte
en n beker woater
n knappe kerel om te zain
hold vout bie stuk
gain mens ken hom beproaten
en hai zit er nait allain
de leden van zien gemainte
bennen t roerend met hom ains.

Doar zit er
bie ons ien e kerk
betrokken en actief
veul van zien kameroaden
is er n beetje kwiet
zai bennen aan t speulen
op t voetbaalveld
vuilen zuk ien kerkbanken
wat te veul bekneld
mor Daniël hold vol
loat zich nait beproaten
al vienden ze hom
zo aans as zai
ien aal zien doun en loaten

God geft hom meer
dan hai verwacht
wat n riekdom,
wat n kracht!

Coby Poelman-Duisterwinkel

Uut: "Grunneger Biebelgedichten"

vrijdag 6 januari 2012

Innerlek gesprek

Met niks bennen we kommen
met niks zollen we goan

houdatzo, roesen de stromen
n koele wiend bloast aan:
deur God bistoe kommen
en met Hom magstoe goan
doe magst zelfs bie Hom wonen

hai wakkert nog wat aan:
hest genoten, wil er waiten
van alle goaven daist kreegst
wat vónst t mooi dervan te dailen
ik luuster en beweeg

gain dag heb ik nait kennen eten
en kleren heb ik bie de vleet
noeit zel ik dit gesprek vergeten
ik dank Joe Voader dat ik leef!

Gedachten bie 1 Timotheüs 6 : 6 – 11

Coby Poelman-Duisterwinkel

donderdag 5 januari 2012

Beliedenis

God het de mens
n Helper geven
zodat er nait
allain huft leven.
Toen Hai Hom
noar ons stuurd had
zag Er dat t goud was.

Verheugd wil ik
mie aan Hom waiden:
Ja Heer, k loat mie
deur Joe laiden.
Dat Joen vreugd
ien mie mag stroalen,
deur mie hen
Joen Geest vertoalen.

Coby Poelman-Duisterwinkel

woensdag 4 januari 2012

t Jonassen van Jona

Ien t pikkeduuster
van de vis
zit t Jona dwaars
dat er bie hom
gain ruggegroat is.
Hai jonast as n foetus
en zien geleuf wordt groot.
Hai geft zich over,
vis begunt te spijen,
t is
of er vannijs
geboren is.

Hai dut
wat er doun mos
mor t kwoad komt bovendrieven.
Zun ken er nait verdroagen.
Hai heurt Gods vroagen,
komt d olle Jona weer tegen.
Van zo’n baarg laifde
wordt er met homzulf verlegen.

Ien t nij geboren licht
jonast Jona
veur Gods aangezicht.

Coby Poelman-Duisterwinkel.

dinsdag 3 januari 2012

De woare wienstok

Deur de sapstroom
van de wienstok
stromend
ien de ranken
vörmen zich
heerleke vruchten.

Deur de laifde
van de Voader
stromend
ien Zien kiender
vörmen zich
de vruchten van de Geest.

Coby Poelman-Duisterwinkel.

Bie Johannes 15 : 1 – 8.

maandag 2 januari 2012

(B)oogcontact


As t regent
en de zun schient,

Joe noar beneden,
ik omhoog kiek

den stoan wie even
oog ien oog

verbonden
deur Joen regenboog.
 
Coby Poelman-Duisterwinkel

Bie Genesis 9 : 16


Uut de bundel: 'Grunneger Biebelgedichten'