Heur ik Ain?

Ien de nacht
klinkt er n zaachte stem
met Goddeleke kracht:
Woar blifst, mien kiend,
Ik wacht.

Coby Poelman-Duisterwinkel

Wat hest ien huus?

Uut ain klain kroekje
stroomt zunder ophollen
veurroad veur t leven,
kroeken vol.
Hai stelt dai hulp vragt
nait teleur mor helpt
nee, nait deur
t geven van geld.

Deur t schenken
van wat ien huus is.
Wat schenkboar is
schenkt makkelk vot
mor as dit kostboar vocht
nait aan de man brocht wordt
is t nog vergese muite.

Met hulp van Hom
ken ze zich zulf bedruipen.
Ien dit geboar vuilt ze
Zien stil protest
tegen t onrecht
wat heur trof.


Coby Poelman – Duisterwinkel

2 Koningen 4 : 1 - 7


Schreven veur de Grunneger dainst ien Westerbrouk op 29 september 2013 bie de preek van domenee E.J. Struif.

Ik geloof ien God

Dai ons ontwörpen het,
vanmörn weer lait ontwoaken,
verbörgen ons omgeft,
Dai noeit zien woord zel breken,
zien Zeun lait oversteken,
t leven gruien dut,
ons veur de dood beschut,
formeerder van ons oademtocht,
vol eerbied neumen wie Hom God.

Coby Poelman-Duisterwinkel

Doe laiverd, hest alles?

Vandoag
n nije dag
zegt hai,
we kriegen
wéér n schone lai.
Den moakt er
zien veters vast,
pakt opgewekt zien jas,
kust mie n goeie dag
en fietst de oprit of.

As ik hom uutzwaai
denk ik noa.
Hai geeft
ien n paar woorden
Zien levensvreugde weer.
Ik heur ien zien ofschaid
de oadem van de Heer,

Ik ben verrast!

Coby Poelman-Duisterwinkel

Wisselzang

t Mooie
van de wisselzang
is wat het met je dut.

Zo luusterend noar
wat de mannen zingen
vuil je de uutstroaling

van Christus zulf,
Zien laifde landt

tot ien de daipte
van joen haart.

Zo zegenend bezongen
geef je der antwoord op

ien klanken uut de hoge
weeromkommend

as de daauw

den vuilt het
of de Voader zulf
Zien kiender neudegt

ien Zien traauw.

Coby Poelman - Duisterwinkel

Vonnen!

Hai raip zien buren

en zien vrunden

omdat Hai mie vonnen haar.

Ik was verdwoald,

verloor mien grenzen

mor Hai zocht deur

tot Hai mie zag.

Woarom mos elk

zien vreugde delen,

was ik zo weerdevol veur Hom?

Nog vuil ik hou zien bliedschap

deur mie beefde,

zelfs buurman zag

het trillen van mien mond.

As Hai toch nait

was blieven zuiken,

dronk ik den oeit Zien toafelwien?

Zien vrunden zellen

met de buren

veur altijd metgetugen.

　

Coby Poelman - Duisterwinkel

Vrij noar Lucas 15 : 3 - 7

　

Sterren ien de mörn

Doezenden sterretjes
twinkelen ien t gras,

zun spiegelt
regenboogkleuren.
t Groen ien de mörn
as de hemel bie nacht,
t licht van Gods goudhaid
dauwt schitterpracht!

Coby Poelman - Duisterwinkel

Grunneger Biebelgedichten ien Toal en taiken

Ien Toal en taiken stait mien emailadres n beetje verkeerd schreven. t Goeie emailadres is cobytjeert@live.nl

Luustervinken

Ik ving wat op vanmörn,

t ging over de preek,

d ain zee tegen d aander;

t was weer zo cliché,

dou zee d aander tegen d ain

bidstoe nog wel es den

veur onze domenee,

nou nee, allaang nait meer,

dou waren ze stil

en ben ik votvlogen,

ik zag nog net

dai doef doar boven.

Coby Poelman-Duisterwinkel

　

Stille voaderdag

Stille voaderdag

Op dizze stille voaderdag

denk ik aan alle kiender

van wel pa der nait meer is,

vandoag n dag is van gemis.

Geef Heer dat juust op dizze dag

Joen laifde om heur tou weden mag.

Coby Poelman-Duisterwinkel

Traauwe bidders

As d allerleste
uutdroagen is,
’t olderlek huus verloaten,
besefst ains te meer
dast nait allain dien olders mist
mor ook dien traauwste bidders

en tegeliek

gait ien n kring
n koor van bidders stoan
dai deurgoan woar zai bleven,
die neumen ien Zien noam.

Coby Poelman-Duisterwinkel

Kunstwaark van Sjoke Wassenaar

Koningsdag

 

De Nederlandse vlag kleurt rood-wit-blaauw,

de wimpel wappert fleureg ien oranje,

de Voaderlandse vlag viert hemeltraauw.

De Nederlandse vlag kleurt rood-wit-blaauw,

't Is God op Wel de volksliedzanger baauwt,

Hom hulde brengend onder sierlek franje.

De Nederlandse vlag kleurt rood-wit-blaauw,

de wimpel wappert fleureg ien oranje.

Coby Poelman-Duisterwinkel

 

t Kunstwaark is van Hélène Grégoire 

Ien Hom

Ik ben,
as vruchtwodder rondom n feutes,
zo is Hai om mie hen,
Zien waarme schoot,
mien burcht!

Coby Poelman-Duisterwinkel

Uut de bundel 'Grunneger Biebelgedichten'

Nij bouk: Grunneger Biebelgedichten

Hai kost 9,95 en het 98 bladzieden

Zunder verzendkosten te bestellen bie cobytjeert@live.nl

Recensie ien protestantse kerkbode van 8 juni 2013

Dagblad van t Noorden het er ook n stukje over schreven:
http://www4.dvhn.nl/nieuws/cultuur/article9702233.ece/Grunneger-Biebelgedichten

 n preview is te bekieken op http://bestelmijnboek.nl/vm-cat/dichtbundels/grunneger-biebelgedichten-detail

Op veurroad bie

Boekhandel Riemer en Polycarpus ien stad, Danhoff en Schoelier ien Zuudhörn en
de Borg ien Grootegast

en te lain ien
de centrale bibliotheek Groningen
en de bibliotheek van de Rijksuniversiteit Groningen  

---