Welkom op mien blog http://grunnegerbiebelgedichten.blogspot.com
Noast de Grunneger Biebel is er misschain ook vroag noar Grunneger gedichten over biebeldailen of geleufsgedichten.
De gedichten dai joe hier lezen mag je met vermelden van mien noam ook bruken veur joen liturgie, kerkblad of zukswat.
Ain van mien bouken is ien t Grunnens schreven. Dat is t bouk Grunneger Biebelgedichten. Dit bouk (12,95) ken je ook bestellen via 06 20182396 of via cobytjeert@live.nl Den huif je gain portokosten betoalen. (Aal mien bouken, 13 stuks, bennen bie bestelmijnboek.nl en bol.com te koop en te lain ien biebeltaik van stad.)
Mocht u de Nederlandse vertaling zoeken van deze gedichten, die kunt u vinden op http://schriftgedichten.blogspot.com/
Ik hoop dat elk zich hier thuus vuilt en wens joe n baarg leesplezaaier. Vrundeleke groet van Coby Poelman-Duisterwinkel.

woensdag 26 augustus 2015

Veur de koordichter


As ik aan t schrieven ben
denk ik voak aan die,
doe trekst mie over mien verlegenhaid hen,
zoastoe ien gesprek gingst met Ik ben,
benuimdest wat hail goud was
mor ook dat wat goud mis ging
en aal die dingen uutsprakst
woarst hail slim spiet van hast.

Kiek, dat ken ik ien die
zo aarg woarderen,
Doe draaist er nait om hen,
doe schrikst er nait veur trug
om wat die deert
publieklek uut te spreken
 en as die de gort goar is
 zegst dat ook.

Doe waist gewoon
Hai luustert
ien aal omstandegheden,
Dat is dien staarke kaant,
doe troost mie ook.

Ien dien gedichten
lees ik n groot vertraauwen,
dat dut wat met mie,
t geft mie zoveul moud.
Zoas God die bielichtte
ervoar k Hom ook bie mie
en dat komt met
deur die!

Coby Poelman - Duisterwinkel

Uut: "Grunneger Biebelgedichten" (2013)

Schreven veur de Biebelvertoalslag van de Liudgerstichten

vrijdag 21 augustus 2015

Kring van kracht



De peerdebloem
is uutbluid,
tere takjes taikenen
n aureool om steel.

n Meneertiekje
bekruupt het pluus,
zien pootjes hoaken
ien t zachte wit
asof t vertellen wil,

wost droagen
deur n kring gebeden
die deur de Wiend verwaaien
noar t Laand van Licht.

Coby Poelman - Duisterwinkel