Fluusterstemmen ien de kerstnaacht

Jozef,

sloapst al?

Nee?

Ik ken ook nait

ien sloap kommen.

k wil nog even

tegen die zeggen

dat ik die

geweldig vien

zoastoe mie steund hest

met het Kiend,

doe bist zo’n

goeie man en voader,

kiek nou toch es

hou er doar ligt,

der is n glaans

op Zien gezicht

en Jozef,

wat er ook

gebeuren mag,

God het dat zo wild

en den is t goud,

o Jozef,

wat bewonder ik dien moud.

Coby Poelman - Duisterwinkel

Allain dien noam

Ien de stilte

van mien sloapvertrek,
met Voader ien gesprek
neum ik dien noam.
Hai ken die en
wait as gain aander
wastoe hest.
Niks huf ik uut te leggen,
allain dien noam
en alles is zegd.

Ik denk aan Zien beloften,
aan wat ons wacht,
wat Hai destieds vertelde
en nou zo helder oplicht
ien dizze donkere nacht.

Ik neum dien noam
en vroag Hom kracht.

Coby Poelman - Duisterwinkel

Ain kudde

Hai haar t over schoapen

en heur aigenoaregheden.

Wolven waren

hierveur slim beducht

want as n kudde

van de baargen

oafstörmen kwam

ging maineg wolf

wel op de vlucht,

moar laip n schoap

allain te dwoalen

waren de wolven

nait van de lucht.

Hai haar zich denk ik

zo in heur verdaipt

omdat God zulf hom

ooit as herder raip.

Coby Poelman-Duisterwinkel

Bie Johannes 10 : 16

Uut de bundel: "Grunneger Biebelgedichten"

Kunstwaark van Sjoke Wassenaar

Kerkdainst

Tussen de kerkgangers
landen Joen woorden Heer,
ons geven ien t Onze Voader,
want ons ken ons
en elk kent wel een stried
van nou of van destieds,
wie bidden om
vergeving veur mekoar,
veur onze schuld,
vergeven schuldenoar
en zo veurover bogen
denken wie aan Joen preken,
Heer dank veur Joen gebed,
dat het opnij mag spreken.

Coby Poelman - Duisterwinkel

Ien Gods stilte

Heer, de stilte soest nog noa,
k heurde Joen zaachte stem
noa alle drokte en lewaai
woar ik ien verzeild was.
Toen Joe mie zagen
vernam ook ik dat Joe der waren.
Joe tilden mie uut alles wat mie bond,
Joe namen mie met, Joen stilte ien
dai zo behoaglek vuilde
dat ik doar altied blieven wol.
Bie Joe ien aarm liekt alles zoveul aans,
zoas Joen aarm mie laaidt.

Joen Geest beroert mien denken, mien gedachten,
brengen mie noar Joen stille inneghaaid.
Zo ien Joen vaailighaid vuil ik mie goud,
het is as een ooase noa n woeste zee.
Allain al deur mie ien Joen aarm te woanen
geef ik Joe al mien zorgen of.
Joe zingen met al Joen zuverhaid
mie noar een haailege hoogte,
doar juucht mien haart in eerbiedwoardeghaid
omdat Joe Heer mien leven laiden.
Ik pries Joen noam
dai mie zo vrij dut goan.

Coby Poelman - Duisterwinkel

t Liesterlaid

Ik zing een laid onder de linde,

een liester voert de boventoon,

wie zingen soamen op noar boven,

de liester luustert ien de kroon.

As ik  mien laid uutzongen heb

zingt hai boven mie weer deur,

nou luuster ik noar wat ik heur.

Soamen loven wie de Schepper,

baiden op ons aigen menaier,

ien de pauze zingt de schepping,

nemt ons met op hemelrais.

Liester ien de hoge linde,

klaproos ien t gruine gras,

blief getugen van dai vrede

dai zo levend bie ons was.

Coby Poelman - Duisterwinkel

Verlöst

O Heer, ik ben zo oplucht

dat Joe mien schuld

begroaven hemmen ien de Hof,

zo ken ik met Joe verder

en dreug mien troanen oaf.

Weer onderweg noar Poasen,

ik dwoal nóg wel es oaf

maar wait mie deur Joe opschoond

ien Joen vergevingslot.

Coby Poelman - Duisterwinkel