Welkom op mien blog http://grunnegerbiebelgedichten.blogspot.com
Noast de Grunneger Biebel is er misschain ook vroag noar Grunneger gedichten over biebeldailen of geleufsgedichten.
De gedichten dai joe hier lezen mag je met vermelden van mien noam ook bruken veur joen liturgie, kerkblad of zukswat.
Ain van mien bouken is ien t Grunnens schreven. Dat is t bouk Grunneger Biebelgedichten. Dit bouk (12,95) ken je ook bestellen via 06 20182396 of via cobytjeert@live.nl Den huif je gain portokosten betoalen. (Aal mien bouken, 13 stuks, bennen bie bestelmijnboek.nl en bol.com te koop en te lain ien biebeltaik van stad.)
Mocht u de Nederlandse vertaling zoeken van deze gedichten, die kunt u vinden op http://schriftgedichten.blogspot.com/
Ik hoop dat elk zich hier thuus vuilt en wens joe n baarg leesplezaaier. Vrundeleke groet van Coby Poelman-Duisterwinkel.

donderdag 20 juni 2019

Komst ook boeten?


Kom, loop weer es een rondje
en zwaai dien aarms zwiereg lös,
kiek es noar aal die vogels,
ben ze nait prachteg uutdöst?
Zuik es n keer een schelpkespad,
verwonder die om wastoe zugst
asofst veur t eerst noar boeten magst
en as n kiend kiekst noar een mug.
Zo wordt aal t grieze kleureg
en elke dag weer aans,
wordst zulf ook weer wat fleureg,
gun die zo’n boetenkaans.  

Kom, roupt het middagzunnetje
en zwaai dien aarms ien de moat,
geniet mor es, ik gun het je,
wacht nait totdat ik ondergoa,
geen sportschaul ken der tegenop,
kriegst lopende energie,
zo lopst die lös van elk getob,
kom, gun die zo’n traktoatie!
Zwaai onderwegens noar die vrouw
achter heur orchideeën
of noar de buurman met zien hond,
komst al wat op ideeën?

Loat die toch noar boeten trommen
ook as het weer wat graauw is,
zo lekker om weer thuus te kommen,
veuraal as het heul kold is,
en alles liekt veul minder zwoar
den houst het achterlaitst
een wandeling per dag verlicht
ook nog es stil verdrait.
En loopst toch laiver nait allain,
zuik wat vertraauwd gezelschap,
kiek onderwegens, zugst al ain,
wel kruust al joarenlaang dien pad?

Coby Poelman - Duisterwinkel

zondag 5 mei 2019

Ik ben Dai Ik ben



As Joe met ons bennen,
alle doagen,
en zegd hemmen
Ik ben dai Ik ben
en zel weden
wel Ik weden zel,

as Joe ien Joen Woord
ons zoveul kracht
geven tot geloven,

wel zol den
ons braandend haart
nog doven?
 
Bie Exodus 3 : 13, 14

Coby Poelman-Duisterwinkel


Uut de bundel 'Grunneger Biebelgedichten'

Foto is nomen vanuut kerkje van Fransum

zondag 28 april 2019

Bie Psaalm 62


                        
Ien de stilte zuik ik God,
ik ben der zeker van
dat Hai mien Helper is,
wat mie ook overkomt,
Hai het der wait van
omdat er altied bie mie is
want Hai bewoont mien ziel,
Hai holt mie overenne
as k stroekel of al viel.
As mensen ons tegenwaarken,
met Hom ben ik nait baang,
Hai loat nait lös wat Hai begon.

Ien de stilte vien ik God,
ik ben der zeker van
dat Hai mien Helper blift,
wat mie ook overkomt.
Hai zörgt er veur dat t stil wordt
ien mien ziel en Hai geft rust ien mie.
Al nuigen mie riekdom, oardse schatten,
ik blief der nait aan hangen,
as Hai mie nuigt loat k alles stoan
want Hai kiekt noar mie om,
wat ben k nou zunder Hom,
wat Hai ons zegt dat echoot deur.
Kracht komt van Hom,
Zien goudhaid is wat k heur,
Hai wacht ien open deur.

Coby Poelman-Duisterwinkel


Schreven veur de Grunneger dainst ien Westerbroek woar Psaalm 62 overwogen werd.

maandag 4 maart 2019

Veur de koordichter


As ik aan t schrieven ben
denk ik voak aan die,
doe trekst mie over mien verlegenhaid hen,
zoastoe ien gesprek gingst met Ik ben,
benuimdest wat hail goud was
mor ook dat wat goud mis ging
en aal die dingen uutsprakst
woarst hail slim spiet van hast.

Kiek, dat ken ik ien die
zo aarg woarderen,
Doe draaist er nait om hen,
doe schrikst er nait veur trug
om wat die deert
publieklek uut te spreken
 en as die de gort goar is
 zegst dat ook.

Doe waist gewoon
Hai luustert
ien aal omstandegheden,
Dat is dien staarke kaant,
doe troost mie ook.

Ien dien gedichten
lees ik n groot vertraauwen,
dat dut wat met mie,
t geft mie zoveul moud.
Zoas God die bielichtte
ervoar k Hom ook bie mie
en dat komt met
deur die!

Coby Poelman - Duisterwinkel

Uut: "Grunneger Biebelgedichten" (2013)

donderdag 13 december 2018

Fluusterstemmen ien de kerstnaacht


Jozef,
sloapst al?
Nee?
Ik ken ook nait
ien sloap kommen.
k wil nog even
tegen die zeggen
dat ik die
geweldig vien
zoastoe mie steund hest
met het Kiend,
doe bist zo’n
goeie man en voader,
kiek nou toch es
hou er doar ligt,
der is n glaans
op Zien gezicht

en Jozef,
wat er ook
gebeuren mag,
God het dat zo wild
en den is t goud,
o Jozef,
wat bewonder ik dien moud.

Coby Poelman - Duisterwinkel