Fluusterstemmen ien de kerstnaacht

Jozef,

sloapst al?

Nee?

Ik ken ook nait

ien sloap kommen.

k wil nog even

tegen die zeggen

dat ik die

geweldig vien

zoastoe mie steund hest

met het Kiend,

doe bist zo’n

goeie man en voader,

kiek nou toch es

hou er doar ligt,

der is n glaans

op Zien gezicht

en Jozef,

wat er ook

gebeuren mag,

God het dat zo wild

en den is t goud,

o Jozef,

wat bewonder ik dien moud.

Coby Poelman - Duisterwinkel

Kerstoavend

Stil es,

kerkdeur is open,

Biebel ook,

Vrede veur joe

zegt Hai.

Coby Poelman-Duisterwinkel

Het kunstwerk is van Harry Meerveld, de kerk van Breede

Hail en zegen

Van geslacht op geslacht

wer t hail

van God verwacht,

Zien zegen

deurgeven,

dat Hai joe

ook nou

vullen mag

met Zien vrede

Coby Poelman-Duisterwinkel


Uut de bundel: 'Grunneger Biebelgedichten'

Adventskedo

Ien kerstboom hangt n ster,
waarkje van kleuterschaul.
Langs deurschienend oranje
omlient fienprikt zwaart
de draihouken,
zes groten en zes klainen

ien golden letters
stait ien t hartje schreven
de metgeven boodschap
Ere zij God!

Ien mien herinneren
zug ik t lutje wichtje,
heur oogjes stroalen
al van ver,
joar in joar uut
schient op t zaacht oranje
n hemels licht over
d allerlaifste ster.

Coby Poelman-Duisterwinkel

Kom mor ien t Licht

As er gain plak is
veur t Licht
dat zich verploatst
ien mensen
donkert t duuster
verder dicht.

Omdat Hai
louter Laifde is
is er as Kiend
op wereld kommen
zodat Hai
ploatsvervangend
de mens
aan t licht
loat kommen
deur t daipste
van de duusternis

opdat t veur altied
Poasen is.

Coby Poelman-Duisterwinkel

Alles goud met moeke en Kiend?

Aargens ien n koamer

stait n berre op klössen.

n vrouw bevaalt.

As pien nait meer

te holden liekt

klinkt t verlössend

schriwwen.

Aargens ien Bethlehem

laip n bevallende vrouw.

n Koamer was der nait,

loat stoan n berre op klössen.

Heur pien werd

hardvochtig meden.

Heur Kiend het loater

pienlijk veul leden

terwail Er kwam 

om te verlössen.

Coby Poelman-Duisterwinkel.

　

　

Is t al licht?

t licht dat schittert ien ogen
van elk dai van laifde braand
veur Christus en Hom wil verhogen,

t licht dat schient in bliede mensen
dai verlangend noar Zien komst
heur vreugdevuur verspraiden,

t licht gericht op t Koningskiend
dat t kwoad overwon
en duusternis verblindt,

dit licht zel met kaarstdoagen branden
en stroalen as n waarm vuur
ien wel aan Hom heur hart verpanden.

Leeft er nog ain ien duusternis?
Geef den as de herders deur
wat die aan weerglans geven is.

Coby Poelman-Duisterwinkel