Ik ben Dai Ik ben

As Joe met ons bennen,

alle doagen,

en zegd hemmen

Ik ben dai Ik ben

en zel weden

wel Ik weden zel,

as Joe ien Joen Woord

ons zoveul kracht

geven tot geloven,

wel zol den

ons braandend haart

nog doven?

　

Bie Exodus 3 : 13, 14

Coby Poelman-Duisterwinkel

Uut de bundel 'Grunneger Biebelgedichten'

Foto is nomen vanuut kerkje van Fransum

Laive ......

Waist nog wel

dast tiedens dien depressie

zo biezunder veur ons werst,

dat wie die alle doagen

om beurten tot berre uut proatten

en lange wandelingen moakten,

wie met mekander oproemden woar stoe

gain moud veur haast

en de voldouning dai dat gaf?

Wat het dat ons

toch n levenszin geven

dat dien depressie veur ons ogen

stukje bie beetje opheven wer

en dast noa aal dai joaren

nog blied de dag ontmoetst

en laaive .....

noamens de haile groep,

wie danken God

en brengen die Zien groet.

Coby Poelman - Duisterwinkel

Zoaleg sproken

  Joen woorden klinken deur

tot woar ien t uterste van t dal
  ain uutblust ligt ien onderwal.

Hai wait nait wat er heurt.

Nou er ten daipste openstait
veur t Woord dat ook veur hom opgait
  wait er dat Ain zich aan hom steurt.

Coby Poelman - Duisterwinkel

Bie Mattheüs 5 : 4

Kring van kracht

De peerdebloem

is uutbluid,

tere takjes taikenen

n aureool om steel.

n Meneertiekje

bekruupt het pluus,

zien pootjes hoaken

ien t zachte wit

asof t vertellen wil,

wost droagen

deur n kring gebeden

die deur de Wiend verwaaien

noar t Laand van Licht.

Coby Poelman - Duisterwinkel

Traauwe bidders

As d allerleste
uutdroagen is,
’t olderlek huus verloaten,
besefst ains te meer
dast nait allain dien olders mist
mor ook dien traauwste bidders

en tegeliek

gait ien n kring
n koor van bidders stoan
dai deurgoan woar zai bleven,
die neumen ien Zien noam.

Coby Poelman-Duisterwinkel

Kunstwaark van Sjoke Wassenaar

Ien Hom

Ik ben,
as vruchtwodder rondom n feutes,
zo is Hai om mie hen,
Zien waarme schoot,
mien burcht!

Coby Poelman-Duisterwinkel

Uut de bundel 'Grunneger Biebelgedichten'

Doe bist n Koningskiend!

Heer,
woar ik klain was,
van gain betaikenenis
ien mensenogen,
kwamen Joe ienaind
met Joen nait uut te meten
hoopgevende en
veulbetaikenende woorden.
Joe waren bie mie
Joen stem klonk deur de wiend

Nog klinkt het koninklek
en krachteg ien mien oren:
Doe bist n Koningskiend!

Coby Poelman-Duisterwinkel

Familie van Jezus

Vrouw,

dai noeit boaren kon

waist da stoe de moeke

van Jezus zulf weden magst?

man,

dai ainigst kiend bleef

waist da stoe de bruier

van Jezus zulf weden magst?

Ien Marcus drai

zee Jezus

dou der t volk overzag:

Hier bennen mien moeke

en mien bruiers

want dai de wil van God doun

dai bennen mien moeke, zus

en bruier.

Bie Marcus 3 vers 31 - 35.

Coby Poelman-Duisterwinkel

Ik ben Dai Ik ben

As Joe met ons bennen,

alle doagen,

en zegd hemmen

Ik ben dai Ik ben

en zel weden

wel Ik weden zel,

as Joe ien Joen Woord

ons zoveul kracht

geven tot geloven,

wel zol den

ons braandend haart

nog doven?

　

Bie Exodus 3 : 13, 14

Coby Poelman-Duisterwinkel

Uut de bundel 'Grunneger Biebelgedichten'

Foto is nomen vanuut kerkje van Fransum

Kracht

Woar komt dai kracht toch vot
ien doagen noa n overlieden
bie zaikte, leed
of pienbestrieden

d aander zwak
joen hulp verwacht
mensen op joen weg broacht

as vleugels onder
over en om joe
vuil je hou
deur n wolk gebeden
joe deur Zien kracht
rechtstreeks worden omgeven.

Coby Poelman-Duisterwinkel

Mien Trooster

Wanneer ik bid
heb ik mien ogen dicht
moar wait Joe noast
of achter mie

as ik mien ogen open
ben Joe verdwenen uut t zicht
moar ien mien haart
stroalt waarm Joen Licht.

Coby Poelman-Duisterwinkel

Hai ken die

Omdat de Heer die wild het
bis toe deur Hom schoapen
Hai haar zien plan al veur die kloar
zag ien de moekeschoot die sloapen
opende stil dien levensoadem doar.

As t duuster ien dien leven wordt
wait die den ien Zien schoot droagen
Hai ken die en herkent t kruus
wait ook dien levensvroagen
woar stoe t nait allain meer kenst
droagt Hai t met die verder

geef die moar over
aan t ritme van zien tred.

Coby Poelman-Duisterwinkel

Bie Psaalm 139.

Lichtende Schaduw

k zag n voage regenboog
over n heldere
henbogen
asof de ain de schaduw
van de aander was.

Mien pas vertroagde,
zilverkleurig vlogen
speulse vogels
veurlaangs
en onderdeur
tegen t lichtend
donkergries.

Ik ondervon
hou schaduwrieke vleugels
zich spraidden over mie.

Coby Poelman-Duisterwinkel.

Bie Psaalm 91