Zunneblommen

Kiek Heer, zo mooi, Joen blommen,

ze gruien noar Joen licht,

heur zoaddroagende haarten

haildaal op Joe richt.

Loaten Joe mie noar heur kieken

met ogen van Joen Geest

om stil te ondervienden

wat men ien blommen leest?

Joe openen mie de ogen

veur dizze scheppenspracht,

Joen licht vörmt om mien binnenste

de stroalen van Joen kracht.

Coby Poelman-Duisterwinkel

As t met Joe mor goud is

Sums ben k mistroosteg, nait zo voak,

mor der gait zoveul mis.

Den kom ik stil bie Joe Heer,

Joe waiten wel wat er is.

Joa, der is overaal wel wat

en naargens is t zoas t heurt

mor t gait je sums zo aan t haart

as der zoveul gebeurt.

Heer, as t met Joe mor goud is,

Joe bennen mien touverloat,

Joe waiten wel dat t op oarde

nait altied hemels goat.

Coby Poelman-Duisterwinkel

Verrassend uutzicht

Heer
ien dit laand
woar baargen schoars bennen
en de doalen minder
klinkt t misschain
wat roar
moar Joe begriepen mie
as gain ander
wanneer ik zeg

Heer
as ik Joe nait haar
den was ik noeit zo
zinvol deur de
doalen kommen
den haar ik nimmer
op dai hoge baarg stoan
woar Joe mie van t uutzicht
laiten genieten;
t dal woar ik met Joe
deurhen goan ben.

Der ging gain dag veurbie
of Joe klommen veur mie aan
en aalgedureg keken Joe
of ik der nog was
en Joe beloofden:
as Ik toch oeit
uut t zicht weden mog
Ik hól die ien t oog.

Heer
wat n Lichtglans geven Joe
dat ik Joe kennen mag
Joe kleuren mien leven
met Joen fleur
en steunen mie
dag aan dag.

Coby Poelman-Duisterwinkel

Poasgevuil op t Pinksterfeest

Dank Joe Voader
veur Joen Geest
zo dichtbie
op dit Pinksterfeest,
ik zag t veur mie
al dai mensen ien
Joen noam bie mekoar
ien vrijmoudighaid
getugend
‘k zag degenen
dai Joen Zeun
wollen krusen
spiet betugen.

Vervul ze dai
nog twiefelen of
dai ontkennen
Zien bestoan

Vol van Joen Geest
zing ik vrijmoudig;
de Zeun van God
is opstoan!

Coby Poelman-Duisterwinkel

Bie Handelingen 2 : 14 – 40

Gebed om Koninkleke kracht

Joe gaven ons Heer
deur 't zwoarste kruus
n nije geest
van Leven
en openden de weg
noar 't Koningshuus

Heer, staark
Joen Koninkleke leden
deur dizze geest
van Leven.

Coby Poelman-Duisterwinkel

Mien Trooster

Wanneer ik bid
heb ik mien ogen dicht
moar wait Joe noast
of achter mie

as ik mien ogen open
ben Joe verdwenen uut t zicht
moar ien mien haart
stroalt waarm Joen Licht.

Coby Poelman-Duisterwinkel