Gebed om Koninkleke kracht

Joe gaven ons Heer
deur 't zwoarste kruus
n nije geest
van Leven
en openden de weg
noar 't Koningshuus

Heer, staark
Joen Koninkleke leden
deur dizze geest
van Leven.

Coby Poelman-Duisterwinkel

Levenslicht

Kiek hou de vrouw
ien boarensnood
heur pien te boven komt
deur ‘t nije leven

hou de Verlösser
ien staarvensnood
de pien ten onder
lait goan

hou de schepping
zuchtend hoopt
op t nog onbekende Leven

Kondig met Poasen
verlöst
de Nije Adam aan!

Coby Poelman-Duisterwinkel


Schreven n.a.v. n heule mooie preek over Johannes 16 : 16-22 en Romeinen 8 : 18-25.
Preek is nog te beluusteren op kerkomroep.nl Martinikerk Grunnen, dainst van 4 maart 2012 om half 10.

Heur laifste laid

Zingen lukt heur nait
moar lichoamstoal
klinkt des te meer
bie ‘t heuren van:
nou zingen wie…

Mien zingen
lukt nait meer,
zolaang ik noar heur
vreugdekreten luuster
dwaars deur heur lieden
drink ik mien troanen ien
en heur van alle zieden
ien glorieus getugenis
wat n Vrund
ons Jezus is.

Coby Poelman-Duisterwinkel

Wel is mien noaste?

Dai Sameritoan,

n vijand ien heur ogen,

deur meelieden

bewogen

zug ik ienainend

met aander ogen

want k heurde op n zundag

dat t Jezus was

dai de stumper zag,

hom op de kneien verzörgde

langs wegkaant

ien t gras.

Waist

wel dien noaste is?

de noaste dat bist

ast deur meelieden bewogen

handelst zoas Hai.

Coby Poelman-Duisterwinkel

Bie Lucas 10 : 25 – 37

Mien Trooster

Wanneer ik bid
heb ik mien ogen dicht
moar wait Joe noast
of achter mie

as ik mien ogen open
ben Joe verdwenen uut t zicht
moar ien mien haart
stroalt waarm Joen Licht.

Coby Poelman-Duisterwinkel